काठमाडौं । नेपाली फुटबल प्रशंसकहरूका लागि रोमाञ्चक खबर ! नेसल नेपाल सुपर लिग (एनएसएल) को तेस्रो संस्करण हिमालय टिभीमार्फत प्रत्यक्ष प्रसारण हुने घोषणा भएको छ। हिमालय टिभी र नेपाल स्पोर्ट्स एन्ड इभेन्ट्स म्यानेजमेन्ट (एनएसइएम) ले संयुक्त रूपमा आज एक प्रेस कार्यक्रममा यसको आधिकारिक घोषणा गरेका छन्। एनएसएल सिजन ३ ले देशभरका फुटबल प्रेमीलाई थप रोमाञ्चक खेलहरूको अनुभव दिने अपेक्षा गरिएको छ। यसपटक पनि ७ फ्रेन्चाइजी टिमहरूबीच प्रतिस्पर्धा हुनेछ, जसले नेपाली फुटबलमा नयाँ ऊर्जा संचार गर्ने विश्वास गरिएको छ। हिमालय टिभीले यस अवसरमा प्रतियोगिताका सबै खेलहरू लाइभ प्रसारण गर्ने जानकारी दिएको छ। यसअघि दुई संस्करण सफलतापूर्वक सम्पन्न भइसकेका छन् भने यसपटकको सिजनले नेपाली फुटबल जगतमा नयाँ उत्साह ल्याउने अपेक्षा छ।

नेपाल सुपर लिग (एनएसएल) (NSL), नेपाल स्पोर्ट्स एन्ड इभेन्ट्स म्यानेजमेन्ट (NSEM) द्वारा आयोजित र एएनएफए (ANFA) को प्राविधिक सहयोगमा संचालित नेपालको पहिलो व्यावसायिक फ्रेन्चाइजी-आधारित फुटबल लिग हो।नेपालको पहिलो व्यावसायिक फ्रेन्चाइजी-आधारित फुटबल लिग, नेपाल सुपर लिग (एनएसएल) ले देशभरिका उत्कृष्ट फुटबल प्रतिभाहरूलाई आकर्षित गर्ने लक्ष्य राखेको छ। यस लिगले नेपाली फुटबललाई व्यापक रूपमा बढावा दिने, प्रतिस्पर्धात्मकता बढाउने, सामुदायिक सहभागितालाई प्रोत्साहन गर्ने र खेलको समग्र विकास गर्ने महत्वाकांक्षा लिएको छ। एनएसएल को विशेषता भनेको यसले खेलाडी र टिमहरू मात्र नभएर, प्रशंसकहरूलाई पनि मैदानमै जोड्ने र खेलको उत्साहसँग आनन्द लिने अवसर प्रदान गर्छ। यसले नेपाली फुटबलमा नयाँ ऊर्जा, व्यावसायिकता र रोमाञ्चकतालाई संयोजन गर्ने प्रयास गरेको छ। नेपाल स्पोर्ट्स एन्ड इभेन्ट्स म्यानेजमेन्ट (एनएसइएम) ले सञ्चालन गरेको यो लिगले देशभरका फुटबल प्रेमीलाई एकताबद्ध गर्दै, नेपाली फुटबलको अन्तर्राष्ट्रिय मानचित्रणमा योगदान पुर्याउने आशा गरिएको छ।