वेस्ट इन्डिजका ब्याट्सम्यान तेग नारायण चन्द्रपालले जिम्बावेविरुद्ध शतक प्रहार गरेका छन् । उनी शिवनारायण चन्द्रपालका छोरा हुन् र उनको नाम शतक प्रहार गर्ने पिता-पुत्र जोडीको सूचीमा परेको छ।

वेस्ट इन्डिजका दिग्गज ब्याट्सम्यान शिवनारायण चन्द्रपलका छोरा तेगनारायण चन्द्रपालले चमत्कार गरेका छन् । तेगनारायणले जिम्बाब्वे विरुद्धको टेस्ट खेलमा उत्कृष्ट शतक प्रहार गरेका थिए । अर्थात् बाबुपछि अब छोराले पनि टेष्ट क्रिकेटमा आफ्नो टोलीका लागि शतक बनाएका छन् ।

जिम्बाब्वे विरुद्धको टेस्ट म्याचमा वेस्ट इन्डिजले शानदार ब्याटिङ गर्दै ८९ ओभरमा बिना विकेट गुमाएर २२१ रन बनाएको छ । शिवनारायण चन्द्रपालका छोरा तेगनारायणले २९१ बलमा १० चौका र १ छक्का प्रहार गरी १०१ रन बनाएका छन् । 

उनीसँगै ब्याटिङ गरिरहेका क्रेग ब्रेथवेटले पनि शतक बनाएका छन् भने अहिलेसम्म २४६ बलमा ११६ रन बनाएका छन् । क्रेग ब्राथवेटले आफ्नो इनिङ्समा ७ चौका प्रहार गरेका छन् । वर्षाका कारण खेलको दोस्रो दिन ३८ ओभर मात्रै खेल्न सकेको थियो ।