ललितपुर मेयर्स कप महिला च्याम्पियनसिपको उपाधि एपीएफ क्लबले जितेको छ । बिहीबार सम्पन्न भएको प्रतियोगिताको फाइनलमा कोशी प्रदेशलाई ५४ रनले हराउँदै एपीएफले प्रतियोगिताको उपाधि जितेको हो ।

कीर्तिपुरस्थित टीयू क्रिकेट मैदानमा भएको खेलमा एपीएफले निर्धारित २० ओभरमा १ विकेट गुमाउँदै १ सय ५४ रन बनाएको थियो। जवाफी ब्याटिङमा उत्रिएको कोशीले निर्धारित २० ओभरमा ५ विकेट गुमाउँदै १ सय रन मात्र बनाउन सक्यो ।

एपीएफका लागि कप्तान सीता राना मगरले ७९ रन बनाइन भने इन्दु वर्माले ५१ रन बनाइन्।

बलिङतर्फ कोशी प्रदेशकी एलिसा खडियाले १ विकेट लिइन्।

त्यसपछि जवाफी ब्याटिङमा उत्रिएको कोशी प्रदेशका कप्तान रुबिना क्षेत्रीले ३५ रन, लकिता राजवंशीले २१ रन, अप्सरी बेगमले १० रन र स्मृति कटुवालले ८ रन बनाइन्।

बलिङतर्फ एपीएफका बिनु बुढाले सर्वाधिक २ विकेट लिँदा रेखा रावल, सोनु खड्का र नेरी थापाले समान १ विकेट लिए।

लिग चरणबाट एपीएफ शीर्ष स्थान र कोशी प्रदेश दोस्रो स्थानमा रहँदै फाइनलमा स्थान बनाएका थिए।