नेपाली क्रिकेट टिमका पूर्व कप्तान सन्दीप लामिछानेमाथिको बलात्कार मुद्दाको फैसला आज हुने भएको छ । सन्दीपविरुद्ध कम उमेरकी नाबालिकले गत वर्ष बलात्कारको आरोप लगाएर उजूरी दर्ता गरेकी थिइन् । यसबारे प्रहरीले अनुसन्धान गरी उनीविरुद्ध मुद्दा दायर गरेको थियो । त्यसपछि विदेशमा रहेका उनी नेपाल फर्किएलगत्तै पक्राउ परी हिरासत हुँदै कारागारमा राखिएका थिए ।

काठमाण्डौ जिल्ला अदालतले सन्दीपमाथिको मुद्दाको फैसलाको पेशी आज तोकेको हो । काठमाण्डौ जिल्ला अदालतले मुद्दा पुर्पक्षका लागि थुनामा पठाएकोमा पाटन उच्च अदालतले सन्दीपलाई २० लाख रुपैयाँ धरौटीमा छोडेको थियो ।

त्यस्तै फागुन १५ गतेको सर्वोच्च अदालतको संयुक्त इजलासले क्रिकेटर सन्दीप लामिछानेलाई विदेशमा गएर प्रतियोगितामा भाग लिन कुनै अवरोध नगर्नु भन्ने आदेश दिएको थियो । न्यायाधीशद्वय सपना प्रधान मल्ल र डा. कुमार चुडालको संयुक्त इजलासले उच्च अदालतको सर्तसहितको धरौटीमा छाड्ने आदेशको प्रकरण २१ को ‘क’ बदर गर्दै अन्य विषय सदर गरेको थियो ।

सन्दीप धरौटीमा रिहाई भई पुनः राष्ट्रिय टिममा समावेश छन् ।