ललितपुर मेयर कप महिला क्रिकेटमा मधेश प्रदेशलाई ६२ रनले हराउँदै कोशी प्रदेश फाइनलमा पुगेको छ । यो जितसँगै कोशीले विभागीय टोली एपीएफसँग फाइनलमा प्रतिस्पर्धा गर्नेछ । 
मधेशलाई रुविना क्षेत्रीको अलराउन्डर प्रदर्शनले फराकिलो अन्तरमा पराजित गर्यो । कोशीका लागि रुविनाले ब्याटिङबाट ३८ बलमा ६ चौका सहित ३९ रन बनाइन् भने बलिङमा २ विकेट लिइन् ।
त्रिवि क्रिकेट मैदानमा टस हारेर ब्याटिङ गरेको कोशीका काजोल श्रेष्ठले २२ रन बनाइन् । कोशीले पहिलो विकेटमा ४० रनको साझेदारी गरेको थियो ।

अप्सरी बेगमले १९ रन, स्मृति कटुवालले १० रन बनाए भने अन्य ब्याटरले दोहोरो अंकमा रन बनाउन सकेनन् । मधेशका लागि सरस्वती चौधरी, अमिरन निशा र अमिशा पटेलले समान २–२ विकेट लिए ।
कोशीले दिएको १०६ रनको विजयी लक्ष्य पछ्याएको मधेशले निर्धारित २० ओभरमा ९ विकेट गुमाउँदै ४३ रन मात्र बनाउन सफल भयो ।
मधेशका लागि सरस्वती चौधरीले मात्र दोहोरो अंकमा रन बनाइन्, उनले १७ बलमा १ चौका प्रहार गरिन् । साना प्रविनले ८ रन, सन्तोषी चौधरीले ५ रन बनाए ।
४ खेलमा चार जित सहित ८ अंकका साथ एपीएफ शीर्षमा छ भने कोशी प्रदेश ४ खेलमा ३ जित र १ हारसहित ६ अंकका साथ दोस्रो स्थान गरि फाइनलमा पुगेको छ ।